SON DƏQİQƏ

PressDent.Info

Tikinti materialları bazarı həm bahalaşıb, həm “ölüb”...

Tikinti materialları bazarı həm bahalaşıb, həm “ölüb”...
21-01-2016, 17:31 22185 dəfə baxılıb

Bəzi materialların qiymətində cüzi enmə olsa da, əksərinin qiyməti qalxıb.
 
Son günlər gömrükdə sahibkarlara yeni güzəştlərin tətbiq ediləcəyi, inhisarçılığın aradan qaldırılması üçün əsaslı tədbirlərin görüldüyü ilə bağlı məlumatlar yayılır.  Manatın ikinci devalvasiyasından sonra isə ölkədə ən çox qiymət artımı tikinti materialları bazarında müşahidə olunmuşdu. Xüsusilə də taxtanın 1 kubunun  qiyməti 300 manata qədər bahalaşmışdı. Bu isə taxtadan hazırlanan digər tikinti materiallarının da qiymətinə təsirsiz ötüşməmişdi. Taxta satıcıları iddia edirdilər ki, dolların manata nisbətdə bahalaşması və gömrük xərclərinin yüksək olmasına görə qiymətləri qaldırmağa məcbur olublar. 
 
Bəs gömrükdə güzəştlərin olduğu dönəmdə tikinti materialları bazarında qiymətlər necədir?
 
Musavat.com-un əməkdaşı tikinti materialları bazarında şahidi olub ki, bəzi materialların qiymətində cüzi enmə olsa da, əksərinin qiyməti qalxıb. Ötən həftə taxtanın 1 kubunun qiyməti 300 manat idisə, hazırda Dərnəgül yolunda yerləşən tikinti materialları bazarında taxta 280-300 manata satılır. Satıcılar bildirirlər ki, dolların bahalaşması fonunda qiymətlərin endirilməsi gözlənilmir. 
 
Lakin tamet daşların qiymətində nisbətən enmə müşahidə olunur. Belə ki, ötən həftə tametin qiyməti 6-8 manat idisə, hazırda 3-6 manat arasında dəyişən qiymətlərlə bu tikinti materialını almaq olar. Satıcılar bildirirlər ki, tamet əsasən ölkədə istehsal olunur. Xaricdən alınmadığı üçün qiymətində bir o qədər də artımın olacağı gözlənilmir. 
 
Lakin taxtadan hazırlanan qapıların, pəncərələrin və digər bu kimi tikinti materiallarının qiymətində enmə yoxdur. Əksinə, ötən həftə ilə müqayisədə qapıların qiymətində 30 manata qədər bahalaşma var. Satıcılar bildirirlər ki, onlar adətən qapıları hazır formada xaricdən dollarla alırlar. Dolların isə bahalaşması bu materialların qiymətinin artmasına səbəb olub. Yəni bunun taxtanın kubunun qiymətinin bahalaşmasına aidiyyəti yoxdur. 
 
İstilik sistemlərinin qiymətində  də artım müşahidə olunur. Məsələn, əvvəllər 750 manata olan kombilər  hazırda 850 manata satılır. 
 
Satıcıların sözlərinə görə, ümumiyyətlə, bazarda satış demək olar ki, yox səviyyəsindədir. Satıcı Vüqarla söhbətimizdə o bildirdi ki,  bu  hal tikinti sektorunda işlərin dayanması ilə bağlıdır: “Son zamanlar tikinti sektorunda işlər də dayanıb. Bu da bazara təsir edir. Yanvar ayından isə ümumiyyətlə, satış yox səviyyəsindədir. Qiymət artandan sonra da camaatın bazardan ayağı kəsilib. Ona görə də elə əlimizdə olan malı satırıq. Çox adam əlində olan malı satmadığı üçün gedib yeni mal gətirmir”.

ŞƏRH YAZ
OXŞAR XƏBƏRLƏR
SON DƏQİQƏ