SON DƏQİQƏ

PressDent.Info

Rasim Əliyevin ölümü ilə bağlı iş Ali Məhkəmədə araşdırılacaq

Rasim Əliyevin ölümü ilə bağlı iş Ali Məhkəmədə araşdırılacaq
18-06-2016, 19:49 37932 dəfə baxılıb

Apelyasiya məhkəməsinin ilkin qərarından şikayət verilib

Jurnalist Rasim Əliyevin döyülüb öldürülməsilə bağlı apelyasiya məhkəməsinin ilkin baxış iclasının qərarından Ali Məhkəməyə şikayət verilib. Bu iş üzrə təqsirləndirilən şəxslərdən biri Kənan Mədətovun vəkili Rəsul Yusifbəyli apelyasiya şikayətinə məhkəmə istintaqı aparılmadan, əlavə sübutlar tədqiq olunmadan baxılmasına dair qərardan narazı qalıb. Bu barədə dünən Bakı Apellyasiya Məhkəməsində bu işə baxan hakim Qədim Babayev məlumat verib.

Hakim eyni zamanda, digər dörd təqsirləndirilən şəxsin – Elşən Ismayılov, Camal Məmmədov, Arif Əliyev və Samir Mustafayevin müdafiəçisi Şəmsəddin Quliyevin ötən məhkəmə iclasında qaldırdığı vəsatətlə bağlı qərarı açıqlayıb. Vəkil həmin vəsatətdə mərhum Rasim Əliyevin döyüləndən sonra 1 saylı Kliniki Tibbi Mərkəzdə rentgen müayinəsinin nəticələrinin alınıb işə əlavə olunmasını istəmişdi. Hakim vəsatətin təmin olunmadığını açıqlayıb.

Mərhum jurnalistin anası Teyfurə Əliyevanın nümayəndəsi, vəkil Fariz Namazlı da ilkin baxış iclasının qərarından kassasiya şikayəti verəcəklərini məhkəmənin nəzərinə çatdırıb.

Bakı Apelyasiya Məhkəməsində bu iş üzrə proses Ali Məhkəmə kassasiya şikayətlərinə baxıb qərar çıxarana qədər – qeyri-müəyyən vaxtadək təxirə salınıb.

Fariz Namazlı “Azadlıq”a açıqlamasında bildirib ki, apelyasiya şikayətinə məhkəmə istintaqı aparılmadan baxılması barədə qərar onları qane edə bilməz: “Məhkəmənin bu işə sübutlar araşdırılmadan baxılması barədə qərarı bizim mənafeyimizə ziddir. Şəxslər dindirilmədən, sübutlar araşdırılmadan obyektiv məhkəmə araşdırmasından söhbət gedə bilməz”.

Rasim Əliyev ötən il avqustun 8-də bir qrup şəxs tərəfindən döyülüb və 9-na keçən gecə xəstəxanada dünyasını dəyişib. Jurnalistin ölümü ilə əlaqədar 6 nəfər həbs olunub. Onlardan beşi – Elşən Ismayılov, Arif Əliyev, Camal Məmmədov, Kənan Mədətov və Samir Mustafayev CM-nin 126.3-cü (qəsdən bədənə ağır xəsarət yetirmə ölümə səbəb olduqda) maddəsilə təqsirli bilinərək, 9 ildən 13 ilə qədər azadlıqdan məhrum edilib. “Qəbələ” futbol klubunun keçmiş kapitanı Cavid Hüseynovun işi isə istintaqın sonunda ayrılıb və o, bu yaxınlarda CM-nin 307-ci (cinayəti bilib xəbər verməmə) maddəsilə 4 il azadlıqdan məhrum edilib.

 

ŞƏRH YAZ
OXŞAR XƏBƏRLƏR
SON DƏQİQƏ