SON DƏQİQƏ

PressDent.Info

Səid Dadaşbəylinin yaxınları MTN-dəki dəhşətlərdən prezidentə yazdı

Səid Dadaşbəylinin yaxınları MTN-dəki dəhşətlərdən prezidentə yazdı
4-11-2015, 18:09 29938 dəfə baxılıb

“Şərlənmiş balalarımız günahsız olaraq ittiham olunaraq azadlıqdan məhrum edildilər; işgəncə zamanı toyuna bir ay qalmış Emin Məmmədov öldürüldü”
 
Səid Dadaşbəylinin müdafiə komitəsi prezident İlham Əliyevə, baş prokuror Zakir Qaralovavə Azərbaycan kütləvi informasiya vasitələrinə müraciət edib. “Yeni Müsavat”a  daxil olan müraciətdə prezidentə 17 oktyabr sərəncamı əsasında nazir Eldar Mahmudovun vəzifəsindən kənarlaşdırılması və ardınca bir qrup zabitin həbs edilməsinə görə təşəkkür edilir: “MTN-in oğurluqla, soyğunçuluqla məşğul olan yüksək rütbəli məmurlardan təşkil olunmuş cinayətkar dəstə fəaliyyəti dayandırmağınıza görə Sizə dərin təşəkkürümüzü, minnətdarlığımızı bildiririk. Biz əmin idik ki, Milli Təhlükəsizlik Nazirliyində baş verən bu biabırçılığı gec-tez aşkar edəcəksiniz. Hələ 2008, 2009, 2010-cu illərdə nazirliyin əməlləri barədə sizə müraciət etmişdik. Ancaq bu müraciətlərin sizə çatmadığını da bilirdik. Çünki nazirliyin sabiq rəhbərliyi buna imkan vermirdi. Güman ki, ona görə müraciətlərimiz cavabsız qalırdı. Sonuncu dəfə sizinlə bərabər Respublika Prokurorluğuna, Ədliyyə Nazirliyinə, Milli Məclisə, Prezident Administrasiyasına müraciət göndərsək də, reaksiya olmadı. Valideynlər 2007-ci ilin yanvarında MTN-nin əməliyyat qrupunun Səid Dadaşbəyli və onunla bərabər 15 nəfəri həbsini xatırladaraq bildirir ki, gənclərə qarşı dövlətə xəyanət, hakimiyyəti zorakarlıq yolla ələ keçirmək, qanunsuz silah sürsat və narkotik maddələrin saxlanması ilə bağlı (şahidsiz, sübutsuz, əsassız olaraq işgəncə verərək, hətta işgəncə zamanı toyuna bir ay qalmış Emin Məmmədov öldürüldü) ittihamlar irəli sürüldü: "Bundan əlavə 15 nəfəri “Hizbullah”, “Fəth”, “Hizb-ut-təxrir” və digər dini təşkilatların, hətta nə qədər absurd səslənsə də, masonçuluqda ittiham etdilər. Beləliklə, bu saxta ittihamlarla şərlənmiş balalarımız günahsız olaraq ittiham olunaraq azadlıqdan məhrum edildilər”.
 
Müraciətdə gənclərin 10 ay MTN-in təcridxanasında görünməmiş işgəncələrə məruz qaldığı bildirilir: “10 aylıq işgəncədən sonra 2 ay qapalı məhkəmə prosesinə start verildi. Hakim Ənvər Seyidov “mən sizə heç bir köməklik edə bilməyəcəm. Bu MTN-nin sifarişidir, günahınız olsa da, olmasa da” deyərək əlacsızlığını və sifarişli hökm çıxaracağını gizlətməmişdi. Nəticədə Səid Dadaşbəyli ilə 3 nəfərə 14 il, qalanlarına isə 12-13 il azadlıqdan məhrumetmə hökmü çıxarıldı. Apelyasiya Məhkəməsi 2008-ci il mart ayında yenə qapalı şəraitdə 2-3 saat ərzində şahidsiz, sübutsuz və qaldırılan vəsatətləri rədd etməklə əvvəlki hökmü qüvvədə saxlamaqla yekunlaşdı. Səid Dadaşbəyli iqtisadçıdır, 5 dili mükəmməl bilir. 1998-ci ildən həbs olduğu günə kimi "Azeri-Mİ Drilling Amerika-Azərbaycan" müştərək neft şirkətində koordinator vəzifəsində çalışıb. İşlədiyi müddətdə ondan heç bir narazılıq olmayıb və hörmətlə yanaşılıb. Səid Dadaşbəyli ziyalı mühitdə böyüyüb və tərbiyə alıb. Onun amalı və istəyi Azərbaycanda islam dininə radikal deyil, sivil yanaşmanı ictimailəşdirmək idi. Həm də ifrat dindarları sevmirdi. Cənab prezident, Səid Dadaşbəylinin dövlətə qarşı heç bir iddiası olmayıb, çünki siyasi mənsubiyyəti yox idi. 2 övlad atası olan Səid Dadaşbəylinin məhkəmə ərəfəsində ailəsi ölkəni tərk etməyə məcbur olmuşdu. Cənab Prezident, MTN-nin bu qanunsuzluğundan 8 il 9 ay ötsə də, heç vaxt ümidimizi itirmədik. Düşünürdük ki, bir gün gələcək haqq-ədalət öz yerini tutacaq. İnanırıq ki, 15 gəncə qarşı olan bu özbaşınalığın aradan qaldırılmasına göstəriş verəcəksiniz”.
 

 

S.Dadaşbəylinin və iş üzrə həbsə alınan digər şxəslərin yaxınları ümidlərinin yalnız prezidentə olduğunu, ona inandıqlarını qeyd ediblər. Ümid edirlər ki, prezident iş üzrə ədalətli qərarın verilməsinə yol açacaq göstərişlər verəcək. 

ŞƏRH YAZ
OXŞAR XƏBƏRLƏR
SON DƏQİQƏ